徹夜纏綿

K房內。
小雪輕輕的倚在我肩上。始終是剛入職的, 三幾杯入肚已不勝酒力, 兩頰微紅, 雙目半合, 用最嫵媚的眼神望著我。
"你知道嗎?我從來也沒有跟客人說自己的事呢!都唔知點解一見到你就想向你訴苦!"
從小雪口中得知她家境不錯, 有個哥哥在桂林讀大學, 一家四口本應生活無憂, 樂聚天倫。偏偏阿爸應酬客人時係K房識到第二個, 小雪一怒之下出走CP, 當起小姐, 為著看看此等煙花地有何吸引, 會弄得她家四分五裂。

剛高歌一曲<愛如潮水>後, 我帶著半沙啞的聲音道: "可能我真係靚仔到你乜都想同我分享呢?"
"咪玩啦!想嘔呀!" 她半咸淡的廣東話加上嫣然一笑經已將我的心神從香港國金二期五十樓那堆會殺人的上市文件, 一手拉到這位芳華十八, 青春動人但身形跟年齡毫不相符既墮天使身邊。小雪根本唔屬於這裡- 雖然學歷不高談吐卻很有禮而且能跟你大談中外大事 (由西藏暴動到冠希事件), 外表也沒有"撈"味, 最緊要的是她從不缺錢, 連她自己也覺得不需屈在這裡。

望住小雪, 我想起為國犧牲的王佳芝, 當然我唔係玉樹臨風既偉哥, 佢個種氣質根本唔屬於呢度, 如果唔係係呢度相遇, 我相信同小雪應該可以成為一對戀人。不過, 依家都未算壞, 我決定將小雪納為紅顏知己, 每月見面一次...

"我今晚好想搵個人傾計呀..."小雪咁講。
"無問題!今晚我地黎個促膝談心徹夜纏綿啦~" 我轉個頭對部長說: "唔該~拎手袋!"

我感到自己已經墮入萬劫不復既陷阱...

自信

曾幾何時, 占仔塊面無一處係光滑既, 呢個狀況令到占仔有好一段時間唔敢抬起頭望人
曾幾何時, 占仔懷疑自己患有口吃病, 成日講錯野又口窒窒, 搞到成個人開始變得沉默
曾幾何時, 占仔覺得自己好無內涵修養, 完全唔可以同人講上三句

依家, 占仔皮膚有丁點改善, 但仍未令占仔可以於clubbing跟女生搭訕
依家, 占仔確定自己無口吃, 但仍未可以滔滔不絕咁講野
依家, 占仔大學畢業, 而且做左2年野, 但係只覺得比之前更無內涵修養

說到底, 是自信心作崇吧?

究竟係乜野支持自信嫁呢?

手提電腦情意結

一直以黎, 占仔都好想有一部notebook, 等占仔出trip做present或者check email都方便好多, 不過咁, 以占仔既工作量同係公司既地位, notebook對占仔黎講無咩大作用...加上占仔本住拎埋bonus就閃人既決心, 如果依家先黎拎部notebook好似係度玩野咁...所以前2日大佬問我有部notebook會唔會方便d既時候, 占仔都話:冇咁既需要...

事實上占仔覺得有部notebook某程度上係專業既象徵, 尤其係作為一個sales或者比較對客既職位, 有部notebook可以令你可以係會面中作即使反應(例如quotation, discount等), 無疑係一個優勢, 不過相對黎講擁有公司既notebook好似同在家工作劃上等號, 我見好多同事或者其他公司既員工已經遲收工, 仲要帶部notebook返屋企做, well, 占仔唔係話唔放心力比公司, 但係咁樣好似唔係咁好...

唔知咁多位老闆自己有冇notebook?又或者有冇資助notebook比有需要員工呢?

最後的trip

占仔決定放棄了，放棄當一個sales，也放一位非常友善的大佬。

一直以黎，占仔都覺得銷售係一間公司入裡最重要亦係最難掌握既工作，基於占仔日後好想自己搞生意，所以占仔覺得一定要試下銷售工作有幾難。well，占仔不嬲都以為自己努力既話無野做唔到嫁．．．但係做落呢，其實又唔係完全做唔到野，不過，我諗我真係唔係好忍受到sales個種好似好唔實在既工作模式．．．或者咁講，占仔份人覺得自己做到數都好似唔係自己功勞咁（咁當然公司如果係要追數既占仔應該兜左好耐），所以sales黎講唔會比到好大成功感比占仔，希望呢份工可以比占仔知道銷售既運作同難處，對日後有幫助啦！

不過占仔諗住黎緊出trip時同大佬口頭上講聲先，唉．．．真係最難受莫過於此呀！

又講創業

每次占仔同占媽講創業，就會出現以下對話，恆久不變：
媽：你想做乜生意呀？
占：未諗到呀，諗到我借錢都做左啦！
媽：阿仔你個性格係做唔到生意嫁！
占：點解呀？
媽：你人又心軟，口才又唔好，咪比ｄ生意佬吞晒你ｄ錢！
占；所以我咪會搵阿ｘｘ，ｙｙ一齊搞，分工合作，佢地又咁tough唔會比人呃呀！
媽：咁你好似都唔駛點做咁，不如拎錢去投資一間公司好過啦！
占：......

唔知各老闆又點睇呢？
係咁多位話搞生意既時候有冇聽過ｄ乜意見呢？

港男 vs 港女 之(集)雜思

一直都留意港男港女之間的指摘,男話女大小姐崇洋乜都奉旨等等;女鬧男懶散無鬥心無風度之類,沒完沒了。又帶出男女平等等問題, 講真...占仔都聽到有d怕,究竟點解要互相話黎話去呢?

今日睇到薯條小姐<可憐的男人>一文當中又提到港男無風度, 男女平等既問題。占仔大膽想係度發表下自己意見...

究竟何謂風度呢?占仔覺得風度真係建基於性別上...你見到阿婆過馬路去扶佢唔係風度, 見到小妹妹仆低問佢有冇事唔係風度。風度可以話係無謂野,但係又可以係修養既一種表現, 個人覺得食飯幫女仔拉椅係風度,拉門比女仔係風度...係咁...究竟係提倡男女平等既時候, 風度係咪有矛盾呢?

男女平等既定義就更加模糊...係完全男女做既事要相同, 享有相同權利丫, 定係某個範疇入面擁有平等呢? 占仔一向都覺得男女冇可能平等, 女人可以哺乳, 男人可以當眾赤膊...各有各權利義務長處, 無可能在同一平台上比較, 又點可以講平等呢?

仲有文中提到男人被女人取去高職重位, 弄得要以其他東西突顯男人氣慨...其實...占仔都會因女性成就高於自己而卻步...但係唔代表男性被女人迫到無野好做咁...占仔同朋友爭論過一個問題: 就係以前既女人幸福定依家既女人幸福?友人覺得從前女性在愛情上冇得揀, 多以盲婚啞嫁, 基於離異係大醜事, 咁樣就一世嫁喇...友人認為係從一而終既角度上女性好幸福, 起碼一生只愛一人...well...呢個占仔不予置評, 但係友人提到以前男主外, 女主內, 女性只要相夫教子, 係d男人養唔起頭家先搞到依家要身兼搵錢同理家既重責, 呢樣其實占仔唔太同意: 我諗男女關係好講各司其職, 依家亦都轉型緊, 我見到越黎越少女人係識家頭細務既同時, 洗衫煮飯既家庭主夫都越黎越多, 咁大家係質疑緊呢個現象?定係唔鐘意呢個現象發生?

其實點解港男港女要咁多指摘呢?唔鐘意大不了咪搵鬼仔, 溝台妹law...
惡性既批評唔會對關係或問題有幫助
多一分尊重 給一點包容先可以改善關係...

共勉之...


後: 完全唔知自己寫乜...好亂, 如有得罪 多多包涵

認命

我認命了。

我承認我真的不是做sales的材料, 曾幾何時, 我唔理別人因我寡言內向而睇死我做唔到sales, 於是我由中學開始就試不同既sales(當然係因為sales易搵到啦), promotor in-shop cold call 到依家office sales都試過, 一直唔想放棄既原因係因為我覺得一日克服唔到sales呢樣野, 我係唔會成功, 人生每一日都係度sell緊野, 唔向人推銷就永無出頭天...以前我係咁諗嫁!但係越黎越發覺自己真係唔係sales既料:第一我口才唔好,冇可能死都拗返生, 將一個唔會買你野既客變到會買你野(well其實有可能不過我唔覺得sales techniques係主因);第二我覺得自己好討厭求人,或者無事不登三寶殿既感覺,呢個可能係占仔自己諗錯方向;第三亦都係最大鑊既係占仔根本覺得sales係好實在既工作, 佢可以好直接咁用target黎反映到自己既performance,但係唔係占仔做緊呢份可以做到...咁樣, 好似占仔呢類好想做到野又或者好要feel到自己有做野既人, sales跟本就唔係出路, 所以占仔唯有認命, 放低"以為自己無所不能"既自大, 搵返自己擅長/鐘意既野, 其他野...就由其他人去分工啦~

究竟點解占仔可以有咁多時間係公司無所事事呢?作為上司佢冇可能唔知我有冇野做嫁喎...我問佢佢又話冇...咁我可以點? 唉...

朋友 vs 情人

又到聖誕，對好多有情人黎講係一個甜蜜溫馨既節日，但係對單身人士就唔多唔少有點贈興，雖然可以同家人朋友慶祝，甚至以工作催眠自己，但係呢個Lonely Christmas夜深人靜既時候少不免會輕嘆身邊沒個人伴著欣賞燈飾。

占仔身邊有幾個老死都識左十年八載，雖然係佢地心目中占仔都無乜邊個聖誕唔可以冇人陪，但實際上今個聖誕占仔好大機會一個人渡過，偏偏佢地大部份都心有所屬，今個聖誕有幾個比女友cap住連見都未必有得見，其他有目標既都要好似英超”開快車”進行節日攻勢。相比起來，占仔唯有寄情事業，努力思考將來既路啦！

講開又講，占仔覺得戀愛中既人真係冇可能兼顧到朋友嫁！根本生活中多左一個咁親密既人，你無辦法唔放棄一ｄ野，家人無可能，朋友就係最佳選擇，你話無所謂可以一齊玩咩？可能我死板啦，係可以玩，但乜事都冇二人世界既戀愛係乜野？你話可以同另一半互相遷就咩？你試下同佢講”朋友同你一樣重要”，睇下佢會唔會殺左你？占仔自己可能仲細未識愛人，所以每一次都係因寂寞而拍拖，但慢慢又會走回朋友處，最後因冷落另一半而告終。希望有一日占仔會學懂點樣去愛人啦～

The greatest thing you'll ever learn is to love and be love in return...

誰又騎著那鹿車飛過
忘了投下那禮物給我
仍是那燈飾只有今晚
最光最亮卻照亮我的寂寞
誰又能善心親一親我
由唇上來驗證我幸福過
頭上那飄雪想要棲息我肩膊上
到最後也別去摸
MERRY MERRY CHRISTMAS
LONELY LONELY CHRISTMAS
人浪中想真心告白 但你只想聽聽笑話
LONELY LONELY CHRISTMASMERRY
MERRY CHRISTMAS
明日燈飾必須拆下換到歡吹聲不過一剎